అంతా ప్రేమమయం

అంతా ప్రేమమయం
ప్రేమంటే మాయ కాదు
ప్రేమంటే లోయ కాదు
పడిపోయామంటారెందుకో ప్రేమించే జనాలు??

నమ్మకం తో నిలబడే ప్రేమని,
నమ్మితే నిలబెట్టే ప్రేమని,
నమిలి మింగే ప్రేమంటారే ఓడితే జనాలు!!

ప్రేమకు ఓటమి లేదు,
ప్రేమకు గెలుపూ లేదు,
ఎందుకంటే ప్రేమకు పోటీయే లేదు

ప్రేమికులొకటైతే ప్రేమ గెలిచినట్టా?
కాస్త అటు ఇటైతే ప్రేమ ఓడినట్టా??
ఓటమైనా మనదే!!
గెలుపైనా మనదే!!
ఓడితే ప్రేమంటే తెలియనట్టు
గెలిస్తే ప్రేమని మరచినట్టు
మనం ఓడినా,మనం గెలిచినా..
ప్రేమిస్తూ ఉన్నంత వరకు ప్రేమ గెలిచినట్టు!!

ప్రేమిస్తూ ప్రేమను ఇస్తున్నామని అనుకోవడమా ప్రేమ??
ప్రేమించబడే ఆ మనసుకే తెలుసు ఎంత గొప్పదో ప్రేమ.
ఇచ్చేవారి ఆస్తి కాదు ప్రేమ.
పొందేవారి అనుభూతే ప్రేమ.

అమ్మాయి కోసం అయితే టెలిస్కోపులా
అమ్మ,నాన్నల కోసం మైక్రోస్కోపులా
దూరాలను సవరించే అద్దం కాదు ఈ ప్రేమ!!
ఎవరికైనా ఒకేలా, చివరి దాకా నిలిచేలా
స్వచ్చమైనది,నిర్మలమైనది నిజమైన ప్రేమ.

రూపానికొక ప్రేమ, రంగుకొక ప్రేమ,
పేరుకొక ప్రేమ,వయసుకొక ప్రేమ,
అవని తలం పై ఉన్నాయి అనంత రీతుల ప్రేమలు.
అందుకే కదా ప్రపంచమంతా ఈ అసమానతలు
అర్థం మారిన ప్రేమ వెనుక ఓ స్వార్థం ఉంటుంది.
అంతటా ఒకే ప్రేమ వెలిస్తే భువి స్వర్గం ఔతుంది